ကိုဗစ်ကာကွယ်ခြင်းဆိုင်ရာမေးခွန်းများ အပိုင်း(၅)

#ကိုဗစ်ကာကွယ်ခြင်းဆိုင်ရာမေးခွန်းများ (13.7.21)

=================================

1. ကိုဗစ်ကာကွယ်ဖို့ ပိုက်ဆံ၊ အပြင်မှ ဝယ်လာသော ပစ္စည်းများကို အရက်ပြန်ကို စပရေးဘူးထဲထည့်ပြီး ဖျန်းပေးတာဟာ အကာကွယ်ဖြစ်ပါရဲ့လားရှင်?

ဈေးမှ ဝယ်လာသော အသားထုတ်၊ ငါးထုတ်တွေကို ပိုးသတ်ဆေးဖျန်းပြီး ဘယ်လောက်ကြာမှ ကိုင်တွယ်ရင် စိတ်ချရပါသလဲ? ဖြေကြားပေးပါရှင်

- ကိုဗစ်ရောဂါပိုးသည် ရောဂါပိုးရှိသူမှတစ်ဆင့် နှာချေ၊ ချောင်းဆိုးသည့်အခါ ထွက်လာသော အမှုန်အမွှားများကို ရှူရှိုက်မိခြင်းမှ အဓိကကူးစက်ပါသည်။

- ပိုက်ဆံ၊ သားငါးပစ္စည်းများ၊ ပြင်ပမှ ဝယ်ယူလာသော ပစ္စည်းများတွင် ကိုဗစ်ပိုးအပြင် အခြားသော ရောဂါပိုးများ ကပ်ငြိနေနိုင်သည်မှာ မှန်သော်လည်း လူကို ကူးစက်နိုင်စွမ်း အလွန်နည်းပါသည်။ အကြောင်းမှာ ကိုဗစ်ရောဂါပိုးသည် သက်ရှိသတ္တဝါ (လူ/တိရစ္ဆာန်) ခန္ဓာကိုယ်ထဲတွင်သာ အသက်ရှင်သန် ပွားများနိုင်ပြီး သက်မဲ့အရာဝတ္ထုများတွင် ပွားများဖို့ မဖြစ်နိုင်ပါ။

- ယခုအချိန်အထိ ထိုပစ္စည်းများမှတစ်ဆင့် ကိုဗစ်ရောဂါကူးစက်သည်ဟူသော အထောက်အထား မရှိသေးပါ။

- ထို့ကြောင့် ထိုပစ္စည်းများ (ထုတ်ပိုးထားသည့် ကျွတ်ကျွတ်အိတ်များအပါအဝင်) ကို အရက်ပြန်ဖျန်းခြင်း၊ အခြားပိုးသတ်ဆေးဖျန်းခြင်း၊ နေလှန်းခြင်း သီးခြား ပြုလုပ်ရန် မလိုအပ်ပါ။ သားငါးအပါအဝင် ဟင်းသီးဟင်းရွက်များကိုလည်း ပုံမှန်အတိုင်း ဆေးကြောသန့်စင်နိုင်ပါသည်။

အဓိကလိုက်နာရမည်မှာ ထိုပစ္စည်းများ ကိုင်တွယ်ပြီးတိုင်းနှင့် အစာမစားခင် ရေနှင့်ဆပ်ပြာ (သို့မဟုတ်) အနည်းဆုံး Alcohol 60% ပါသည့် ရေမလိုလက်သန့်ဆေးရည်သုံးပြီး လက်ကို စနစ်တကျ အနည်းဆုံး စက္ကန့် (၂၀) ကြာအောင် ဆေးရပါမည်။

ရှောင်ကြဥ်ရမည့် အချက်မှာ ထိုပစ္စည်းများ ကိုင်တွယ်ပြီးနောက် လက်မဆေးဘဲ မျက်လုံး၊ နှာခေါင်းနှင့် ပါးစပ်တို့ကို ထိကိုင်ခြင်းမှ ရှောင်ကြဥ်ပါ။

2. "အိမ်မှာ ပိုးရှိလူနာကို အခန်းသီးသန့်ထားပါတယ်၊ လုံးဝအပြင်မထွက်ပါ၊ ဒါပေမယ့် အသက်ကြီးသူနဲ့ ကလေးတွေ ရှိပါတယ်၊ အိမ်မှာရှိသူများ အချိန်ပြည့် mask တပ်ထားရမှာလား? တစ်ခုခုကိုင်ပြီးတိုင်း ကလေးတွေရော လူကြီးတွေရော လက်ဆေးပါတယ်၊ ဒီထက်ပိုပြီး ဘယ်လိုဂရုစိုက်ရအုံးမလဲ? ကလေးတွေကိုကူးမှာကြောက်လို့ပါ"

- အချိန်ပြည့် mask တပ်ဖို့တော့ မလိုအပ်ပါ။ (ပိုးရှိလူနာနေသော အခန်းသည် ကျန်အိမ်ခန်းများနှင့် ဆက်စပ်မနေဘဲ တံခါး၊ ပြတင်းပေါက်သီးသန့် ရှိမည်ဟု ယူဆပါသည်)

- mask တပ်ဆင်ရမည့်သူမှာ ပိုးရှိလူနာကို အနီးကပ်ပြုစုပေးရသူနှင့် ပိုးရှိလူနာကိုယ်တိုင် အခန်းထဲမှ အပြင်သို့ ထွက်တိုင်း (ဥပမာ - ရေအိမ်အသုံးပြုဖို့ ခေတ္တထွက်ခြင်း) mask တပ်ဆင်ရပါမည်။ (အသုံးပြုရမည့် mask အမျိုးအစားကို ဤတွင် ဖတ်ပါ https://www.facebook.com/ckcmohnugmm/posts/106810351671220 )

နှာခေါင်းစည်း (Mask) အမျိုးအစားများကို ရွေးချယ်ဝတ်ဆင်ခြင်

- နေအိမ်၌ ကိုဗစ်သံသယလူနာရှိခြင်းအတွက် ဆောင်ရန်/ ရှောင်ရန်ကို ဤပိုစ့်များတွင် ဖတ်ပါ

https://www.facebook.com/ckcmohnugmm/photos/104948658524056

ကိုဗစ်-၁၉ သံသယလူနာများ မိမိနေအိမ်တွင် သီးခြားနေထိုင်သည့်အခါ လိုက်နာရန်အချက်များ

https://www.facebook.com/ckcmohnugmm/photos/104946725190916

ကိုဗစ်-၁၉ သံသယလူနာများအတွက် သီးခြားနေထိုင်ရန် လမ်းညွှန်ချက်များ

- ပိုးရှိလူနာကို အနီးကပ်ပြုစုပေးသူ သတ်သတ်မှတ်မှတ် တစ်ဦးသာ ထားရှိပါ။ (ငယ်ရွယ်ပြီး ကျန်းမာရေးကောင်းသူ ဖြစ်ရပါမည်။)

- သီးသန့်နေစဥ် ကာလအတွင်း အသက်အရွယ်ကြီးသူနှင့် ကလေးငယ်များကို ပိုးရှိလူနာနှင့် ထိတွေ့ခြင်းမှ အတတ်နိုင်ဆုံး ခေတ္တရှောင်ရန် လိုအပ်ကြောင်း ပြောပြ၊ ရှင်းပြထားပါ။

- အိမ်တွင် တစ်ဦးတစ်ယောက် ကိုဗစ်ရောဂါဖြစ်ပါက ကျန်အိမ်သူအိမ်သားများအားလုံး ရောဂါကူးစက်နိုင်သောကြောင့် အချိန်နှင့်အမျှ သတိရှိပါလေ။

3. စီးပွားရေး အခက်အခဲဖြစ်နေသော လူများမှာ mask စျေးများတက်နေသောကြောင့် cloth mask များ တပ်ကြဖို့ အကြံပေးနေကြတာလည်း တွေ့ရပါတယ်ရှင့်၊ cloth mask က ရောဂါပိုးကို ဘယ်လောက်ထိ ကာကွယ်နိုင်ပါလဲ? တချို့က လုံးဝမကာကွယ်နိုင်ဘူး၊ တပ်လည်း အပိုပဲလို့ပြောနေကြလို့ ရှင်းပြပေးပါရှင့်။

- အဝတ် mask များသည် ချုပ်လုပ်သော ပိတ်သား၊ ပါဝင်သော အလွှာအရေအတွက်ပေါ်မူတည်၍ ကာကွယ်မှု ရာခိုင်နှုန်း အမျိုးမျိုး ကွာခြားပါသည်။

- ကမ္ဘာ့ကျန်းမာရေးအဖွဲ့အစည်း (WHO) မှ ညွှန်းဆိုသော အဝတ် mask တွင် အလွှာ ၃ လွှာ ပါရှိရပါမည်။ ထိုသို့သော အဝတ် mask ကို နေရောင်ထဲ ထောင်ကြည့်သည့်အခါ အလင်းမပေါက်လောက်အောင် ထူတာမျိုး ဖြစ်ရပါမည်။

အပြင်ဆုံးအလွှာ - ‌အရည်မစုပ်နိုင်တဲ့ ပိတ်စ (ဥပမာ - polyester ပိတ်စ) ဖြစ်ရမည်၊ သို့မှသာ တစ်ဖက်လူမှ နှာချေ၊ ချောင်းဆိုးသည့်အခါ ထွက်လာသည့် အမှုန်အမွှားများ အထဲသို့ ရောက်မလာဘဲ mask တွင် တင်ကျန်နေမည် ဖြစ်သည်။

အလယ်လွှာ - ရက်လုပ်မထားဘဲ အရည်မစုပ်နိုင်တဲ့ ပိတ်သား (ဥပမာ - polypropylene အစမျိုး) ဖြစ်ရမည်၊ အပြင်မှ ဝင်ရောက်လာနိုင်သည့် အမှုန်အမွှားများ စစ်ထုတ်ရန် ဖြစ်ပါသည်။

အတွင်းဆုံးအလွှာ - အလွယ်တကူ ရေစုပ်ယူနိုင်တဲ့ ပိတ်စ (ဥပမာ - cotton ချည်သား) ဖြစ်ရမည်၊ သို့မှသာ မိမိစကားပြောစဥ်နှင့် အသက်ရှူထုတ်သည့်အခါ ထွက်လာသည့် အမှုန်အမွှားများကို တစ်ပါးသူထံ မပျံ့နှံ့စေဘဲ mask တွင် စစ်ထုတ်ထားနိုင်မည် ဖြစ်သည်။ ဖြစ်နိုင်လျှင် မိမိမျက်နှာနှင့် ထိကပ်နေသော ဤအတွင်းဆုံးအလွှာကို ပိတ်စအဖြူ သုံးပါ၊ သို့မှသာ ညစ်ပေ၊ စိုစွတ်သည့်အခါ အလွယ်တကူ သိရှိမည် ဖြစ်သည်။

- ထိုကဲ့သို့ အလွှာ ၃ လွှာ ပါရှိသော အဝတ် mask ၏ ကာကွယ်နိုင်စွမ်းမှာ 50-70% ရှိပါသည်။ စနစ်တကျတပ်ဆင်ပုံ၊ ချုပ်လုပ်သော ပိတ်သားတို့ပေါ်မူတည်၍ ရာခိုင်နှုန်း ပြောင်းလဲနိုင်ပါသည်။

- အဝတ် mask အကြောင်း အသေးစိတ် ထပ်မံသိရှိလိုပါက ဤတွင် ဖတ်ပါ။ https://www.facebook.com/ckcmohnugmm/posts/113314311020824

အဝတ်နှာခေါင်းစည်းအကြောင်း သိကောင်းစရာများ

#CovidPrevention

(စေတနာဖြင့် ကိုဗစ်-၁၉ ဗဟုသုတစင်တာမှ ပြန်လည်ကူးယူဖော်ပြပါသည်။)